「夜渡欄河再倚，北風我迎頭再遇，動盪如這海，城在兩岸凝神對視……」朋友，仲記得呢一首《昨夜的渡輪上》嗎？
老餅係老餅咗少少，不過家陣潮流興保育吖嘛，八十後俊男美女隨時比五十後大叔大嬸更加懷舊，所以話啫，歌唔怕舊，最緊要受。
之所以會諗起《昨夜的渡輪上》，其實係有原因嘅。事關政府話喎，考慮到渡輪公司面對長期難以解決嘅問題，所以建議未來三年撥款一億二千萬，補貼六條主要離島渡輪航線，以紓緩加價壓力。
運輸及房屋局發言人表示，資助幅度係渡輪公司申請加幅喺扣減通脹之後嘅一半，形式係透過實報實銷資助維修費用，估計船公司一年大約花費四千萬元維修。
講得鬼咁複雜，不如化繁為簡同大家解釋一下。以票價十五元為例，假設申請加幅係百分之十，而通脹率係百分之三，政府嘅補貼就係百分之七（申請加幅扣減通脹率）嘅一半，即係百分之三點五。換言之，如果加足百分之十，票價會由十五元變成十六元五角，經過政府補貼之後，票價會增加百分之六點五變成十六元。再簡單講多句，政府嘅補貼相當於申請加幅嘅三分之一。
其實講來講去最簡單係呢一句：政府利用公帑補貼離島居民搭船。
好嘞，補貼搭船有冇問題呢？本來問題不大，始終渡輪生意確係難撈，客源買少見少，船公司唔想蝕錢就要加價，政府補貼盡量減低加幅都係好事。之不過咁，你補貼得離島居民搭船，係咪應該一視同仁補貼港九新界市民搭車？巴士乘客要求補貼，港鐵乘客要求補貼，甚至乎飛機乘客都要求補貼，咁咪後患無窮？正所謂，不患寡而患不均，補貼離島居民搭船呢家嘢一定會令人覺得十分不公平。你知啦，香港已經係一個不和諧社會，日後更加爭拗不斷。
其實，利用公帑補貼渡輪係咪唯一辦法？離島區議會主席林偉強就講得啱嘞，政府應該積極研究增加渡輪公司嘅非票務收入，包括容許渡輪公司加建碼頭上蓋，或者將碼頭鄰近用地批畀渡輪公司發展餐飲及旅遊業務。非票務收入增加咯喎，咪可以幫補幫補囉。
喂喂喂，仲有一家嘢非常頭痕，唔好唔記得曾蔭權親細佬曾蔭培由警隊一哥退下火線之後，過檔新渡輪擔任高層。大佬政府補貼細佬公司，難免令人胡思亂想，少不免又係官商勾結呀、私相授受呀、明益親戚呀諸如此類。
曾蔭權舊年先至領教過「慳電膽益親家」嘅萬箭穿心，唔通咁快就好了傷疤忘了痛？
計功夫茶話齋，補貼渡輪行唔通嘅，與其自找麻煩，不如自摑嘴巴，一二三推倒重來算鬼數。唔使怕醜喎，特區政府經常都係朝令夕改㗎啦，慳電膽政策都可以不了了之，衰多一鑊都唔係好瘀皮啫！
咁啦，唱首歌仔自我安慰：「渡輪上，懷念你說生如戰士，披戰衣，滿載清醒再次開始……」