弊傢伙，又衰咗！有語言學家比較過香港、上海以及廣西三地大學生嘅中國語文能力，結果本地學生哥講得好聽叫做贏得季軍，講得難聽即係輸到包尾！
唉，正所謂寧畀人知莫畀人見，香港大學生中文水平每下愈況其實已經係街知巷聞o架嘞，本來側側膊心照不宣咪算囉，好衰唔衰有人實牙實齒搞個比較，當堂證據確鑿見光死。
香港教育學院語言資訊科學研究中心總監鄒嘉彥表示，去年五月測試香港、上海以及廣西各一間大學共數百名學生嘅中文能力，結果上海大學生排第一，廣西排第二，香港排第三。鄒總監又話，將會進一步研究香港學生語文能力較弱嘅原因，初步認為同香港社會對語言要求不足有關。
另外，教育評議會副主席何漢權認為，教育改革取消範文教學，學習變得零碎而缺乏系統，長遠只會令學生語文能力繼續下降，要求教育局重新檢討語文政策。
港產小朋友中文水平點解會咁差嘅呢？點解會輸畀內地同胞嘅呢？計功夫茶話齋，原因不外乎成年人教壞細路哥，正所謂養不教、父之過、教不嚴、師之惰。老師固然要負上極大責任，教育局同樣難辭其咎，至於講到教育局上面嗰一班不學無術官老爺咯喎，更加應該捉去打屁股。譬如話，堂堂特區之首嘅曾蔭權經常開口夾着脷，「冗長」夠膽死讀做「康長」，「感同身受」又會講成「身同感受」，你話嘞，有樣學樣嘅細路哥點會唔學壞先？
唔好話大學生中文差吖，官樣文章更加笑到你碌地。大家有冇諗過環境諮詢委員會屬下曾經有一個「廢物小組」？呢個咁騎呢嘅大寶號係從英文Waste Subcommittee直譯出嚟嘅，用咗一段時間之後先至發覺唔對路，卒之改叫「廢物管理小組」。
喺政府發表嘅芸芸新聞稿之中，類似嘅廢物式中文俯拾皆是，呢嗱嗱嗱，信手拈來搵出曾蔭權替副局長辯護嘅一篇——
「今日我在短時間通知下來到立法會，是本着一個信念，就是希望通過我就這個具爭議性議題的發言，向立法會和公眾作出全面交代。……而今日，我相信行政與立法亦不應再繼續內耗……我起初是感到有些惋惜；也感到失望。但回心一想，在特區政制發展的過程中，這是一場不能迴避；也不應迴避的爭議，因為只有經過民意的理性爭論，大家深入思考，問責制才可不斷修正……」
大佬，功夫茶最痛恨「作出」兩個字，因為純屬多餘到極嘅廢話，偏偏官樣文章永遠「作出」來「作出」去。行政與立法根本係兩個範疇，你可以話係「爭拗」，但唔可以話係「內耗」。大家覺唔覺嗰兩個分號「；」用得好奇怪？仲有，乜嘢叫做「理性爭論」？中文水平只要高少少，肯定會講「理性討論」。短短百幾粒字已經完全暴露政府文膽識字率極低，淨係識得不倫不類嘅港式中文。
騎呢官僚尚且如此可怕，你話嘞，大學生中文點會唔差！