醉酒駕駛，害人害物，呢個道理連三歲細路仔都識，可惜，識還識，由於醉駕而導致嘅慘劇依然不絕於耳。所以話，打擊醉駕一定要拳拳到肉，如果隔靴搔癢，唔單只冇阻嚇力，甚至等於縱容，等於做幫兇。
記得舊年平安夜秀茂坪醉駕車禍嗎？慘死好老師嘅遺孀喺追思會上，流住眼淚呼籲當局關注醉駕問題：「希望今次係最後一次醉駕。」不過，睇怕佢嘅呼籲都係落空居多嘅喇。
港府建議修訂針對醉酒駕駛嘅法例，對違例司機採取三級遞進式刑罰制。簡單啲講，即係血液入面酒精濃度愈高，停牌時間愈長。最短停牌期係半年至兩年，血液酒精濃度達第三級嘅，再次定罪都只係停牌五年。至於好多市民建議終身停牌罰則，對唔住，當局完全冇接納到。
咁即係話，無論初犯又好，屢犯又好，就算醉駕害死幾多人都好，最重刑罰都只係停牌五年，五年後又係一條醉漢。咁寬鬆嘅法例，講句唔好聽，等於縱容及包庇。
正如關注團體話齋，當局嘅建議「完全未夠阻嚇」，甚至弄巧反拙，令人誤解酒後駕駛有「輕重之分」，飲少啲就罰少啲。
有立法會議員建議，第三級停牌五年冇阻嚇力，最高刑罰應該終身停牌。咁就啱喇，醉酒揸車撞死人，肇事司機一定要付出代價。須知對積犯嘅仁慈，係對守法者嘅殘忍，更加係攞市民條命較飛。市民強烈要求用終身釘牌罰則對付醉駕，係因為目前法例太過寬鬆，尤其嗰啲屢醉屢犯嘅司機，根本就係駕駛態度有問題，縱容嘅後果只有一個，就係害死更多人。
舊年春節前夕落馬洲發生六人慘死嘅大車禍，肇事貨車司機酒精測試嚴重超標。當時有死者親屬跪喺煲呔曾面前，聲淚俱下咁請求加重醉駕刑罰，但醉駕司機最終都只係被判入獄六年。
平均害死一條無辜性命只須踎一年監，肇事者出番嚟又可以繼續揸車，如果駕駛態度唔改，仲可能繼續害人。本來應該保護市民安全嘅法例，居然掉轉頭變咗醉駕司機嘅保護傘，唔止諷刺之極，更加係荒謬之極。
仲有更荒謬㗎，就以舊年平安夜秀茂坪致命車禍為例，肇事司機雖然當場畀警方拘捕，但即日就獲准保釋，保釋期間居然唔使停牌，可以繼續揸車。現行法例唔止係無牙老虎，更加係助紂為虐，試問仲要死幾多無辜市民，當局至肯堵塞漏洞，令市民出街唔使提心吊膽？
有人話，港府近年積極推動本港成為紅酒中心，係變相鼓勵市民飲酒。聽落又幾有道理噃，嗱，當局大減紅酒稅，但又冇相應收緊打擊醉駕法例，即係變相縱容醉駕，即係靠害市民啫。計功夫茶話齋，當局繼續任由醉貓通街橫衝直撞，香港未見紅酒中心，已經先變成醉駕天堂喇！