絲絲講場：鄺民彬新卡片 銜頭勁騎呢

阿Ben新卡片上嘅銜頭多到嚇一跳，但認真一睇，除咗上述「負債無限公司」CEO外，仲有「宏觀政經遠景獨立免責分析家」、「笨礦家族資產管理小型辦公室總策略師」、「慾窮心富虛擬金融慈善機構創辦人兼首席執行官」？仲有「零風險超回報佛陀基金義務推廣大使」？真係睇到頭都痕埋！

誇大Title純為搞笑

絲絲立即搵Ben問問，佢話「我搞吓笑咋！見有啲人設計卡片，將銜頭作到大一大，所以想擺啲誇張好笑嘅銜頭入去。現時個個都講大灣區，咪塞埋入去囉！」佢最初想Send畀親朋好友笑吓，點知有啲Friend真係以為佢多嘢做到周身唔得閒。

查實阿Ben實在真係忙，事關佢忙緊進修佛學。早排佢飛去南韓首爾歎個退休旅行，八號嗰日落機回港，第二日就即刻上堂！Ben依家喺香港大學讀緊佛學輔導碩士，返咗幾日學已經要做功課，記錄自己打坐冥想嘅感想，遲啲仲有小組作業同考試添。

Ben笑言，卡片上嘅「零風險超回報佛陀基金義務推廣大使」，確實係佢人生目標。佢話投資實有風險，學佛就零風險，仲回報無限，希望日後可以弘揚佛法！佢仲話，想「法」財，就搵佢啦！

余絲韻