美國聯儲局主席鮑威爾同美國總統特朗普近排就聯儲局減息鬧得面紅耳赤，特朗普曾經批評鮑威爾「無知」同「愚蠢」，更直斥佢係敵人。面對咁嚴厲嘅批評，鮑威爾有苦自己知。不過，正所謂「禍不單行」，就連佢老婆Elissa Leonard近排亦因為支持興建狗公園而遭到居民抨擊。
支持興建狗公園點解會有咁大爭議呢？事緣鮑威爾夫婦係馬里蘭州一個住宅區嘅居民，而老婆大人Elissa仲係該住宅區嘅村委會主席添。Elissa認為現時區內放狗地方太少，而且位置唔便利居民，所以支持興建面積達1.5萬平方呎嘅狗公園，但有居民擔心咁會破壞區內嘅寧靜。
議案最終被村民反對而擱置，有村民甚至奚落鮑威爾夫婦，話「不單狗狗會騷擾居民日常生活，來自華盛頓嘅汽車更加會整污糟居民花園嘅草坪」。
事件曝光後自然成為大眾茶餘飯後嘅話題，有支持興建狗公園嘅人為Elissa被批評感到不值，話狗公園能夠為狗隻提供玩樂和跑步嘅地方。有人更成立Facebook群組同選出「狗鎮長」，希望得到村民支持。
余絲韻