Market Insight：防守股有力跑贏大市

講真，古勝早前都以為打完世界盃成交點都好番些少，豈料港股近兩日成交都係得七字頭，確係出乎意料，雖然樂觀啲睇，好似沽壓唔大，但悲觀睇則可能暗示陰乾式下跌走勢已開始。

短線劏牛誘因較大

從恒指牛熊街貨重貨區分布可見，恒熊重貨區為29,000至29,099點，街貨相對於1,671張期指；至於恒牛街貨重貨區為27,800至27,899點，街貨相當於1,063張期指。單從數字分析，即係大戶要推高800幾點先可以食呢隻熊掌；相反，如果想食盡近千張牛仔，則只需要推低約400點，仲未計再落一格，喺27,600至27,799點之間有近1,400張期指等值的牛仔街貨區，所以話今轉大戶殺落誘因似乎較大。

早前弱過藥煲的中資金融股依舊反彈乏力，五大國有內銀股昨日普遍跌逾1%。講開銀行股，滙豐控股（00005）最新就推出人民幣高息定存優惠吸客，但大家只要諗諗，銀行幾時會計錯數，做蝕本生意先！開得咁高息率去吸引客戶做人仔定存，即間接是對人仔後市看法不會太樂觀，若再伸延至內地經濟，下半年前景係點亦不言而喻了。

香港股市同樓市關係千絲萬縷，近幾個月港股反覆調整，相信本地樓市回調只是時間問題。花旗最新發表的報告就指出，上半年香港樓價進一步上升13%後，下半年調整風險升溫，相信下半年樓價或跌7%。該行又預期，具防守性的股份在下半年將跑贏大市，首選領展房產基金（00823）。

提起領展，投資者不期然想起收息。市場早前預期美國國債孳息率反覆向上，將減低收息股的吸引力，領展股價於六月尾亦一度因而回落至50天線水平。不過，近期美債孳息率升勢放緩，加上港股亦見級級落，相信領展此類派息穩定的公司有機會吸引資金流入，股價短期或再挑戰52周高位75.75元阻力。

中資航空股乏起色

受多項不利消息打擊，如美國財政部考慮豁免部分國家進口伊朗石油，另「侵侵」同普京會面後，俄羅斯有可能提高每日產量等，拖累周一國際油價急跌，石油股及油服股當然冇運行，中國石油（00857）、中國海洋石油（00883）及中石化（00386）股價昨日分別跌0.4至3.3%不等。

不過，就連本應受惠油價下挫的中資航空股，即中國國航（00753）、東方航空（00670）及南方航空（01055），股價仍然無起色。除反映在人仔貶值下，投資者對板塊甚為看淡外，亦反映港股吹淡風下，只選擇對利淡消息有反應，對利好消息視而不見，咁落去大市又點會彈得起？

古勝