上海商業銀行財資業務處總監兼候補行政總裁黃冠球（洋名Paul），原來下個禮拜就退休，真係嚇咗絲絲一跳，咁後生退休？佢自爆已63歲，唔知係咪打拳有功，Keep得咁Fit。
踢館經歷悟靈活攻守
大大隻嘅阿Paul後生時喺拳館學打拳，仲跟埋師傅去踢館添。阿Paul話最難忘係有次跟師傅去踢館，打到後尾見自己一方贏唔到啦，於是就果斷放棄進攻，轉為防守。咁又係呀，硬碰無着數o架。
阿Paul笑稱，好彩自己識得轉變戰略，如果唔係都唔知最尾有冇力行返出去。將退休嘅阿Paul喺上商服務咗成四十年，但望上去仲係好精神，睇嚟都係拜長期打拳做運動所賜。
不過打拳嘅經歷會唔會令佢嘅投資策略偏向保守呢？阿Paul笑笑吓又唔否認，只係話「都有可能」。
余絲韻