曼城生死戰誓殲陸軍
歐聯E組上演生死戰，英超球隊曼城將喺主場迎戰俄超球隊莫斯科中央陸軍。曼城剛喺打吡戰憑阿古路入波擊敗曼聯，球隊士氣如虹，加上對手莫斯科中央陸軍剛喺俄超榜首大戰輸波，匆匆再戰歐聯未必能及時反彈，度士睇好曼城主場可輕取對手，今仗捧讓球主勝。
（有線61及201台周四凌晨3時45分直播）
曼城上輪歐聯作客喺領先兩球下畀中央陸軍逼和都幾唔抵，但當日俄羅斯天氣非常凍，所以一班「藍月亮」球員嘅演出受影響亦屬情有可原。曼城現時喺E組得2分排第3，落後次席嘅羅馬2分，想出線今仗可以話係和都唔得掂。曼城雖然現時有唔少傷兵，除大衞施華外，有傳準備以19萬鎊周薪留用至季尾嘅林柏特亦未能趕及復出，去仗熱身時受傷嘅高拉洛夫又要至少抖一個月，但球隊啱啱喺打吡贏波士氣高昂，相信影響唔大。
陸軍新敗打窒道氣
莫斯科中央陸軍現時喺E組得1分排榜尾，球隊同樣需要贏波先有望保住出線機會。不過佢哋近況認真麻麻，球隊喺上周嘅俄超榜首大戰主場更輸咗畀「一哥」辛尼特，打擊甚大，球員要喺短時間收拾心情同曼城踢歐聯生死戰，絕對唔係一件易事。而且中央陸軍今仗有射手彭真高缺陣，加上仲要作客，度士相信佢哋都係凶多吉少，讓球主勝值得支持。