港交所（00388）上市委員會成員肩負「守龍門」把關新股上市重任，但每年只得八萬蚊「車馬費」，真係「收入同職位不相稱」！
尋日港交所終於公布，會加佢哋人工，其中上市委員會主席每年加到15萬元，加幅高達87.5%；副主席就加56.25%，到12.5萬元；委員亦有得加，每年10萬蚊，加幅25%。
驟眼睇加幅好似幾驚人，但上市委員會由○七年到一四年，足足7年冇加過「車馬費」，而且佢哋每年開會無數，每次開會前仲有成呎厚嘅文件要睇，工作量其實好大。
至於主席同副主席人工加幅特別大，係因為佢哋要主持好多會議，亦預期出席率會較其他委員為高。
過往上市提名委員會，都會喺每年第一季先至物色新一屆上市委員會成員人選，但今年就提早到十一月初就邀請各界人士申請，因為上市提名委員會希望喺委任前，先行同入圍候選人會面，所以需要提早展開申請程序。
絲絲聽聞，上市提名委員會係希望申請同委任過程早啲開始，可以有多啲時間畀提名委員會揀蟀，至作出委任決定。
上市委員會有得加人工，咁港交所行政總裁同員工呢？每逢年尾港交所董事局就會傾明年員工加薪幅度，今年港交所上下為滬港通做咗咁多嘢，雖然開通無期，唔知班老細識唔識做？