惠英紅竹戰防腦退化輸錢都制
金馬影后惠英紅前晚相約好友及傳媒做冬，自爆記憶力開始衰退，擔心遺傳了母親的腦退化，笑言要靠竹戰「治病」！而身邊好友鍾慧冰及林建明因近日天氣轉冷而病倒，令她一度憂心不已。
惠英紅於11月底勇奪台灣金馬獎「最佳女主角」，隨即入組趕拍新戲，直至電影煞科始能停下來「還飯債」，前晚她在酒樓筵開八席，宴請圈中好友及傳媒提前做冬，閨蜜文雪兒、導演羅耀輝、陳果、葉念琛及英皇高層利雅博等紛紛出席，更有粉絲送上蛋糕祝賀。
章高運低自認魚腩
惠英紅受訪時透露聖誕節終於可以休息，因她不喜歡旅遊，故會趁佳節約三五知己竹戰，還自爆花名是「魚腩紅」，她說：「所有人都鍾意同我打牌，我打十次輸足九次半，一直都係章高運低，不過我哋打好細，上落都係幾千蚊，好少輸過萬。」惠英紅又說：「依家真係要打牌，記性開始唔好，好驚有遺傳（惠母患腦退化），但真係唔敢Check……講第二啲嘢嘞！」
恨嫁想搵個伴
一直為事業打拚的惠英紅，至今未覓得良緣，她直認「恨嫁」：「大家誤會我要求高，又或者收埋咗個唔話畀人知，其實我唔使有錢o架，我已經係半個富豪啦！（有乜條件？）心地好、唔使靚仔，要年紀大過我。（唔介意離過婚？）冇所謂，喪偶都冇問題，咁嘅年紀冇過去就有問題嘞。」她又笑言幸而胞妹亦未嫁，大家有個伴：「佢嫁埋我就唔知點算嘞。」
她又透露原本約鍾慧冰及林建明前來食飯：「鍾慧冰脈管炎復發，入咗半日醫院出返嚟嘞，我打佢個電話冇人聽，後來聯絡上咪話畀佢知我好擔心囉！而林建明亦唔係好舒服。轉天氣食緊藥嘅人係差啲，遲啲再約過囉！」
文﹕影視組