(3)許亦妮否認連界9仔：得兩個係男友
《2011香港小姐競選》甫開鑼，幾位佳麗的新聞日日新鮮，(13)蔡慧欣又有攬仔相流出，而(3)許亦妮被指連環界有錢仔，不過許亦妮只承認在九個「男友」中，只有兩個曾拍過拖。
十四位候選佳麗獲溥儀眼鏡贈送太陽眼鏡，為台灣外景拍攝做準備，昨日齊到尖沙咀旗艦店揀選試戴，被指先後有九個男友的許亦妮，再被追問男友多籮籮的事，但她卻否認：「報道中只有James同Elson係男友，其他都係普通朋友，同埋我都冇刻意結識有錢男仔，（擔心影響參選？）唔驚，我會做好自己，（有指王冠因傳你內定冠軍而退選，又指你哋嗌交，你仲爆粗？）無綫唔會有內定，冇嗌交，爆粗係無中生有，（點解咁多人攻擊你？）好難阻止人鍾意或者唔鍾意我，佢哋有講嘢嘅自由，但好多係不盡不實，（係咪搶人男友而被攻擊？）我冇做過第三者。」
劉思希否認整容
此外，來自英國的海外佳麗(13)蔡慧欣亦被人發放了攬仔相，相中的她豪放地攬着外籍紋身男友，蔡慧欣昨日解釋：「嗰張相係我19歲同男友嘅合照，不過已經分手亦冇男友。」問她可會有更激的相流出？她緊張地說：「冇再激嘅相，亦唔知喺香港會有咁嘅反應，依家參選會留意言行。」
另外，(11)劉思希否認眼及鼻曾整容，且不介意拿舊相出來做對照，對於(12)王冠退選，她表示因太忙未有聯絡對方，但不相信退選與傳許亦妮是內定有關。
文：影視組