今季勇士陣營上未有大變，估計都難以爭奪季後賽席位，就算有名帥尼爾遜坐鎮，都係陪跑居多。眾所周知呢位老教頭最鍾意打「Run and Gun」快攻戰術，所以勇士得分力都幾強，今季每場均能夠過百，可惜勇士防守力差勁亦係致命傷，兩個後衞史提芬居里及艾利斯都得個快字，身形單薄且防守技巧遜色，成為球隊防守上最大漏洞，難怪失分亦場場過百。

卡文脫胎換骨搶贏內線

雖然快艇開咧成績同樣麻麻，但要體諒佢哋季初賽程非常難打，對手包括有湖人、小牛及爵士等實力分子，絕對屬非戰之罪。快艇今場續有狀元格芬因傷缺陣，但球隊勝在以逸待勞，自從周二贏完木狼後，足足休息咗三日先打今場波，體力上可秤先。此外快艇中鋒卡文今季表現脫胎換骨，連續兩場都攻入25分以上，就算冇格芬在陣都可以搶贏內線，種種原因下，快艇確實勝算較高。