中環出更：陳肇始貪靚 偷買鬆糕鞋
聖誕將至，街上已經充滿節日氣氛，「願望成真基金」日前為一年一度嘅聖誕慈善義賣活動「分享願望的喜樂」揭開序幕，唔少政商界名人都到場支持基金為患重病兒童實現願望。食物及衞生局副局長陳肇始（Sophia）講起童年時嘅聖誕願望，自言當時好貪靚，有一年聖誕好想買一對當年熱爆嘅鬆糕鞋，點知畀阿媽極力反對；有政商界人士則趁節日當前，反思並珍惜目前擁有嘅一切。
回想童年時嘅聖誕願望，似乎各人都有數之不盡嘅話題，其中Sophia話，細個嘅聖誕願望好簡單，就係每年都想要新衫褲鞋襪，而事實上佢嘅父母每年都會滿足佢呢個願望。不過佢笑言，父母眼光同子女總係存在好大差別，通常父母覺得好睇嘅衫，同佢自己嘅喜好梗係有啲分別。佢憶述，中學時代好興鬆糕鞋，好想擁有一對，殊不知阿媽就一口拒絕，於是佢就儲儲埋埋啲零用錢，有一日喺學校附近嘅鞋舖，買咗一對個底紅白相間嘅鬆糕鞋，最終連阿媽都冇佢乎。
勞工及福利局副局長蕭偉強亦同聖誕有淵源，事關佢係平安夜出世，而細個好鍾意睇漫畫，由於當時家境一般，所以買漫畫係好奢侈嘅事，佢只能趁喺街邊檔剪頭髮時先有機會睇，因此每年聖誕願望都係希望擁有一個漫畫圖書館，仲記得母親有次送咗《三國演義》及《財叔》兩套漫畫畀佢，令佢相當驚喜，至今仍然珍而重之。
劉仲恒反思珍惜所擁有
同場仲有香港醫學專科學院主席李國棟及總商會主席彭耀佳，齊齊現身支持「願望成真基金」主席劉仲恒（Kevin），Kevin認為好多人嘅童年願望都係單純，但長大後嘅願望就變得抽象及難以實現，因此每年呢個節日到來，除咗幫患病兒童實現願望外，亦會思考三個目前擁有並讓自己覺得幸福嘅東西，為自己注入更多力量。
卓妮