政府檔案竟然無王管，而且檔案處人手嚴重不足，過去一年，有多達二十多萬檔案尚未處理。明日復明日，明日何其多，啲檔案積到成座大帽山咁高時，難道又好似貪曾咁銷毀咗當乜事都冇發生過？
據資料顯示，貪曾一二年中離任前，確實銷毀了數量驚人嘅特首辦檔案，總厚度達六十六點五米，當中包括一九九九年至二○○四年嘅預墊備用現金簿中、截至二○○九年為期十年的付款通知書等財務紀錄。而在一二年二月，「貪曾」被東方報業集團踢爆貪盡海陸空連串醜行。
講真，貪曾自把自為，即將離任嘅申訴專員黎年揭露政府的公開資料制度和檔案管理無法可依，貪曾領導嘅特首辦無視定期需移交文件予政府檔案處嘅規定，至換屆才交出及銷毀大量文件且存檔甩漏。阿哥，咁都得？行政長官竟可以如此漠視制度，胡作非為，「不以規矩，不能成方圓」，貪曾禍港七年，難怪搞到香港烏煙瘴氣；銷毀檔案，等如隻手遮天，市民知情權零保障！
《韓非子‧解老》曰：聖人盡隨於萬物之規矩，故曰：「不敢為天下先」。當然，貪曾非聖人，是以「敢為天下先」，銷咗啲檔案，也許就如檔案處嘅前處長話齋：有人好怕留罪證！銷得快，好世界，銷毀咗，你查我唔到，又估我唔到，俗語都有話，寧畀人知莫畀人見吖嘛！
梁啟超嘗言要得到歷史之真相，非單靠書籍，在尋常百姓家故紙堆中，往往可以得到極珍貴之史料，一商店或一家宅之積年流水帳簿，以史家的眼光都係十分珍貴，佢話如果將同仁堂、王麻子這些老字號自開店迄今之帳簿，用科學方法加以研究，則可知百年物價變遷及社會生活狀況之大概。你話喇，連啲流水帳簿都如瑰寶，貪曾銷毀之預墊備用現金簿肯定有許多精彩而不能說的秘密！