東網發威，勢不可擋。東方報業集團銳意發展新媒體，旗艦網站「on.cc東網」精益求精，創新求變，推出短短四個幾月咋，瀏覽量屢創新高，捷報頻傳，全球華人最強資訊網果然實至名歸。為咗答謝海內外網民嘅熱烈捧場，東網決定再推出震撼優惠，《東方日報電子報》全球免費開放延長一個月至四月三十日，讀者又有福喇！
東網有幾受歡迎？嗱，淨係網站每周瀏覽量就已超過一億一千萬頁次，而且仲不斷刷新紀錄，唔到你唔服o架。為慶祝東方報業集團四十五周年報慶，三月一日起全球免費開放《東方日報電子報》後，反應更加熱烈，欲罷不能。過去一個星期，東網各電子刊物總瀏覽量超過三千萬頁次，其中《東方日報電子報》網站及手機嘅總瀏覽頁次，更加比上月大幅增加三倍，而之前率先全球免費開放嘅《太陽報電子報》，瀏覽量同樣節節上升。最值得一提嘅係，東網無遠弗屆，海外讀者人數升幅更加驚人，好多華人直言東網電子報已成為每日必讀刊物。
唔係賣花讚花香，東網發展迅速，不斷締造香港傳媒業歷史，為世界各地讀者提供最貼身、最快捷、最詳盡嘅新聞資訊同評論分析，成為獲取第一手網絡資訊嘅首選，成績有目共睹。呢，美國舊金山駐華辦公室總監趙翠薇就係見證者，佢對東網讚不絕口，話因為工作關係，需要了解內地嘅投資傾向、政治走勢及經濟文化發展，《東方日報電子報》為佢帶來極大方便；英國民權活躍分子林懷燿同樣大讚東網新聞快捷，題材廣泛，免費開放電子報更加係海外華人佳音。
呢啲咪就係口碑囉。東網版圖不斷擴充，讀者群不斷擴闊，連廣告客戶都得益唔少o架。有廣告公司高層讚東網電子刊物方便快捷，原汁原味，讀者人數上升，變相增加廣告效益；亦有廣告公司負責人支持全球免費開放電子報，「多咗人瀏覽，自然多咗人睇廣告啦」。
唔怕唔識貨，最怕貨比貨，東網嘅宗旨係精益求精，不斷提升，為讀者提供最優質服務，讀者及廣告客戶嘅支持就係最大動力。喺度順便提提大家，由於瀏覽人數屢創新高，東網海外頻寬流量已接近上限，為確保瀏覽暢順，東網投入資源購買更多頻寬，網站流量提升咗五成，令更多讀者可以體驗「上東網、知天下」嘅樂趣。總而言之，隨着功能不斷提升，內容不斷創新，東網回饋讀者亦會陸續有來，請大家密切留意喇！