政情：燊哥未能共舞四太感失落
澳門新葡京為慶祝建國六十一周年搞嘅「京影留情」攝影比賽，尋日下午假澳門新葡京酒店舉行頒獎典禮暨作品展覽開幕儀式，賭王何鴻燊四太梁安琪、澳門博彩股份有限公司董事蘇樹輝、董事兼營運總裁吳志誠及名模周汶錡擔任主禮嘉賓。與此同時，尋晚喺澳門塔石體育館亦舉行咗「歌舞星輝耀濠江」晚會，呢個活動一直係燊哥同四太施展舞技嘅場合，但呢兩年燊哥抱恙未能落場，四太坦言感到有少少失落。
四太尋日馬不停蹄出席活動，下午出席完攝影比賽頒獎禮，夜晚又要參加「歌舞星輝耀濠江」晚會。佢憶述，呢個晚會佢同燊哥參加咗十年，但自去年開始已經無再落場跳舞，只會出席晚會儀式。不過佢好樂觀話：「何生身體都幾好，你哋都睇到啦！」仲話呢個世界唔會有十全十美。
問到四太有關佢大女超盈係咪同男朋友分咗手，四太只係話，小朋友嘅事好難講喎。
同場嘅周汶錡就話好鍾意澳門，美食應有盡有，建築物亦有新有舊，話港府應該效法吓。原來周汶錡平時好鍾意影相，作品會用於出書或上載到微博，佢仲同大家分享攝影心得，話風景最難影，人像就較易控制。