公民黨今年中跟住社民連搞「五區公投」，結果慘淡收場，投票率得百分之十七點一，一手促成其事嘅公民黨黨魁、五區公投總發言人余若薇沉寂咗大半年，下月公民黨領導層換屆，佢終於敲定落台走人，唔知係佢本人做到意興闌珊，定係公民黨想棄將保車。
公民黨梁家傑尋日喺大氣電波透露，有意喺下月初嘅公民黨大會上，競逐黨魁之位，又話曾經游說余若薇留任，但余去意已決，咁即係話，公民黨「余若薇時代」快將結束，隨着五區公投湮沒喺歷史洪流之中。
梁家傑話，余同佢講，領導層要不斷更新同輪替，個黨先至可持續發展喎。余若薇能否如願以償，要睇過先知，不過，余若薇落台走人，就係勢所難免，唔到佢想唔想，事關佢一手帶領公民黨走上五區公投不歸路，令公民黨民望下挫，自己聲勢亦大不如前，其實，當時已經有聲音質疑佢應該要問責下台，依家先至走人，已經遲咗啦。