政情：經濟動力向哪吒招手
獲自由黨重點栽培嘅西貢區議員方國珊（哪吒）日前高調退黨，盛傳佢會跟埋另一自由黨「叛將」田北辰，過檔匯賢智庫主席葉劉淑儀即將成立嘅新民黨，激到一眾自由黨高層紮紮跳。不過經過我哋明查暗訪，哪吒埋葉劉堆單嘢應該係流料，反而自由黨另一死對頭經濟動力，就真係有意招攬佢加盟。若然成事，自由黨肯定嬲上加嬲！
自由黨一直強調要功能界別與地區直選「兩條腿走路」，其實由該黨分裂出嚟嘅經濟動力亦都想咁做，不過由於佢哋起步遲過自由黨，至今未出到啲知名度較高嘅直選新星。今次哪吒突然退黨，據聞經濟動力已第一時間同佢接觸，話早喺經濟動力脫離自由黨前已經好欣賞佢，正所謂做生不如做熟，與其過檔從未合作過嘅葉劉新黨，不如加盟佢哋好過。
再者，其實哪吒同自由黨鬧翻嘅底因，係該黨前主席田北俊盛傳將復出再戰立法會新界東直選，搞到佢上位無望，加盟經濟動力就肯定冇呢個問題，只要成功喺區議會出線，經濟動力絕對有錢有力撐佢出選立法會。消息話哪吒初步反應正面，但要等佢同自由黨搞埋啲退黨手尾後，先可以詳細傾談同做決定。
不過話說回來，哪吒講過係因為唔認同自由黨嘅親工商立場而退黨，經濟動力嘅工商背景同包袱可能比自由黨更重，呢段政治婚姻係咪成到事，真係冇人話得埋。
周太為劉健儀抱不平
另外，尋日我哋寫咗自由黨主席劉健儀（Miriam）差啲畀哪吒退黨單嘢激到喊，自由黨前副主席周梁淑怡尋日接受電台訪問時，亦為Miriam抱不平，話Miriam之前無論幾忙都好，只要哪吒出到聲，都會親自落將軍澳撐佢啲活動，畀足資源同機會佢，所以哪吒今次無預警退黨，Miriam真係好傷心。
周太又不點名批評哪吒過往甚少出席黨內大小會議，其他人根本唔知佢對個黨有何意見，到宣布退黨時至話有好多不滿。周太話該黨有大把有能力嘅後生仔等住上位，依家哪吒退咗黨，其他人反而有更多機會發聲同曝光喎。