政情：梁美芬畀高達激到掟筆
立法會房屋事務委員會同發展事務委員會尋日開聯席會議，主要傾房屋土地供應問題，再搭單傾埋深水埗填海區起公屋，前者係大題目，一睇就知，但深水埗起公屋，就似乎應該喺區議會傾，只因居民反對，認為起社區設施好過，傾咗好多年都傾唔掂，於是九龍西直選出嚟嘅立法會議員梁美芬要求提升層次，拎上立法會度拆掂佢。
不過，主持會議嘅房屋事務委員會主席李永達（高達）就好唔同意，話就咗好耐時間，先請到發展局局長林鄭月娥同運輸及房屋局局長鄭汝樺一齊嚟傾房屋土地供應，加上議員們熱烈討論，淨係呢個題目就傾咗個幾鐘，得番二、三十分鐘時間傾深水埗起公屋問題。梁美芬畀高達激到好嬲，大鬧高達安排時間失誤，唔尊重佢提出討論嘅議題，最後嬲到掟筆！高達亦都忍唔住寸番梁美芬，話唔想同佢辯論，但如果佢係都要講嘅話，就真係無時間傾深水埗公屋喇，梁美芬無奈即刻收聲。