政情：大輝鋪路轉軚撐申亞

大輝尋日喺立法會走廊自爆，民政事務局局長曾德成本周一主動搵佢作最後嘅游說，仲足足畀佢「轟炸」咗成個鐘頭，用大輝嘅話說：「你都知佢講嚟講去都係嗰啲嘢㗎啦。」

大輝仲意猶未盡，話申亞並唔係德成局長一個人嘅事情，如果政府可以團結一致，認真處理好本港長遠體育政策嘅話，佢作為一個熱衷於體育事務嘅人，感性上同理性上都會支持申亞。大輝咁講法，似乎係為轉軚留一線喎。

不過即使大輝轉軚都冇用，事關申亞成敗最重要睇民建聯嘅關鍵九票。民記企硬反對，商界代表林健鋒尋日就度咗條「絕世好橋」，話如果政府喺賽事後將選手村改建為「置安心」或居屋單位，並將佢哋出售畀市民，變相復建居屋，一定可以逼到民記「無路可逃」、焗住支持喎。