樹根逼爆石屎磚 危及途人安全
鄰近行人路的斜坡安全惹人關注！鄧先生最近途經葵涌大白田街石籬天主教中學時，發現該校斜坡有破損情況，「啲樹根附近嘅石屎磚裂晒，對落就係行人路，都唔知有冇危險！」鄧擔心影響斜坡結構安全，要求當局主動檢查。
土木工程拓展署發言人稱，已安排土力工程師檢查斜坡，證實斜坡砌石護面上，有一條混凝土橫樑水泥表層出現局部損壞及鬆脫，樹木根部的砌石護面亦出現裂縫，但未有不穩固迹象。該署已建議校方盡快維修，並會跟進工程進度。校方發言人則稱，接獲轉介後隨即圍起受影響範圍，並安排維修工程。
「斜坡旁邊就係行人路，呢啲涉及行人嘅安全，一定要重視處理！」鄧先生希望有關維修工程能夠盡快妥善完成，日後並應該加強定期跟進檢查。