尋日無論係政治同財經新聞都爆到七彩，點解會堆埋一齊爆，心水清嘅人都睇得出有人博大霧。眾所周知，立法會調查梁展文事件嘅報告尋日公布，主席李鳳英喺立法會大會上交代報告後就召開記者會，中午向傳媒解答報告得出嘅結論，但幾乎同一時間，政府相關部門通知話喺政府總部有簡報會。
初時以為唔係煲呔曾就係畀報告鬧到飛起嘅公務員事務局局長「Ｄ姐」俞宗怡出嚟解畫喇，點知竟然係政制及內地事務局局長林瑞麟出嚟話，喺行會前日拍板通過後，尋日宣布向立法會提交兩條政改本地立法草案，聽日刊憲。
行會前日朝早開咗一粒鐘，剩低成日悠悠長，林瑞麟卻偏偏揀撞正調查梁展文事件報告嘅記者會先出嚟講，肯定有蠱惑喇！心水清嘅應該記得，簡介草案嘅其中一部分，係話會修例，令到喺《領事關係條例》（第557章）中嘅領館等，不再合資格登記成為下屆立法會團體選民，即係無得投票。不久前林瑞麟仲力撐駐港領事館人員可登記做選民，既合法亦無違憲，依家出嚟自摑嘴巴，都預咗畀人鬧爆，所以揀正公布調查梁展文事件報告嘅記者會同一時間出嚟，搞到傳媒四圍撲，電子傳媒又趕唔切午間新聞，對佢殺傷力咪細好多囉，擺明係借梁展文事件嚟遮醜。