政情：新民黨發帖招兵買馬
匯賢智庫創辦人兼立法會議員葉劉淑儀宣布組織「新民黨」，尋日先講會喺下個月舉行創黨大典，話口未完，原來葉太已暗地裏招兵買馬，廣發英雄帖，大派「黨員申請表格」，邀請各界人士，包括退休公務員、紀律部隊舊部下同專業人士參加。咁點樣先可以成為黨員呢？好簡單，最低消費盛惠每年一百大元，即一張紅衫魚嘅價錢就可以入黨，全職學生同非在職人士更可獲半價優惠，畀一千蚊仲可以成為終生會員，認真抵玩。
其實新民黨嘅名字都有一段古，就係嚟自《小戴禮記》「大學篇」嘅「大學之道、在明明德，在親民，在止於至善」，宋代儒家學者朱熹其後將「親民」改為「新民」，咁「新民」係咩意思？就係偉大嘅人格，唔單止淨係個人修養，仲要推己及人，關心、教育同改革社會，聽落都幾偉大噃！聞說南韓同台灣都曾經有政黨以新民黨命名，命運就各異；至於個黨徽，好明顯係英文字母「Ｎ」字，即新民黨New People's Party嘅簡寫。
