政情：北京市長向港鐵取經
港鐵四通八達，發展迅速，連北京市市長郭金龍都要偷師。郭市長尋日率領一班官員來港出席「第十四屆北京香港經濟合作研討洽談會」，期間花咗四十分鐘，「旋風式」參觀港鐵，順便偷吓師。
郭市長一行人尋日喺港鐵行政總裁周松崗等港鐵高層陪同下，首先參觀咗機場快線香港站，睇吓港鐵點樣為旅客預辦登機手續，之後又親身試搭機場快線列車，由香港站搭到青衣站，仲喺青衣站港鐵上蓋物業盈翠半島嘅平台逗留一陣，似乎有所領會噃。原來郭市長對港鐵嘅「鐵路加物業」綜合發展模式留下深刻印象，睇吓第日返到北京可唔可以引入呢個結合鐵路同物業同時發展嘅概念，地盡其利。
其實港鐵同北京關係密切，事關港鐵一早已透過聯營公司北京京港地鐵有限公司，齊齊參加北京地鐵四號線嘅營運，依家每日客運量高達七十五萬人次，而全長廿二公里嘅四號線延線北京大興線，預計今年稍後亦會通車，所以港鐵嘅影響都唔少㗎。