政情：劉夢熊吼實超級議席
「結石寶寶之父」趙連海一案喺海內外激起軒然大波，想唔到喺香港政壇亦泛起漣漪。尋日有消息傳出，近日為趙案連番發炮而人氣急升嘅港區全國政協委員劉夢熊，其實正部署參選二○一二年立法會選舉。劉夢熊尋日回覆查詢，否認借趙連海案抽政治油水，話無諗過參選。不過，佢無封後路講死唔選喎，仲話如果要選，一定係選區議會「超級議席」，而「前哨戰」明年區議會選舉亦已有心儀選區，就係佢七三年着住一條泳褲偷渡上岸嘅新界西選區。
反駁金勞詹割席宣言
過去一年頻頻走上本港政治前台、多次上《城市論壇》舌戰「維園阿哥」嘅劉夢熊，近日就趙連海案不斷發炮，直斥係「司法史最黑暗一頁」，又反駁金融服務界立法會議員詹培忠指為趙抗爭嘅人無好下場嘅言論，「值得商榷」。正當建制派內對劉夢熊近期嘅「異動」竊竊私語之際，金勞詹尋日突然喺報紙登全版聲明，暗批有政協委員「譁眾取寵混過名堂，尋求個人名位」，喺聲明尾仲表明同劉夢熊道不同不相為謀，「劃清界線，從此割席」。
劉夢熊狂轟內地法院已經夠激，估唔到金勞詹仲激，玩割席絕交，意態似乎有啲唔尋常。果然尋日就有消息傳出，金勞詹咁激，全因本身從事金融業務嘅劉夢熊有意染指金融服務界，想借趙案「響朵」，下屆循金融服務界進軍立法會。
我哋問金勞詹，佢話與劉夢熊劃清界線，全因政見相悖，並無私怨，仲斬釘截鐵話，劉夢熊唔會選金融服務界，係去直選！咁激？我哋向劉夢熊求證，愈講愈刺激！劉夢熊嘅答案係：「一定唔選金融服務界，如果退一萬步講，我真係要選，都選變相直選嘅功能界別區議會超級議席。」
劉夢熊一再強調至今無諗過選立法會，但對選超級議席要先當選區議員，卻又早有腹稿，就係希望進軍新界西地區。佢話，「大海航行靠舵手，香港總有需要劉夢熊嘅時候」，七三年佢游水來港，孑然一身，「一條泳褲起家」，依家做到上市公司主席、清華大學高級講師，當年佢喺天水圍附近尖鼻咀偷渡上岸，今日飲水思源，所以打算搵新界王劉皇發穿針引線，到天水圍接觸居民，以佢嘅親身經歷，破解區民嘅悲情。
劉夢熊選超級議席，相信無乜人諗過。不過，以佢尋日嘅一番豪情壯語，加上近期趙連海案嘅「異動」，相信好多人有興趣佢未來動向。