中環出更：婦協翻新中心隨時失預算
通脹殺到嚟，樣樣都話貴，最清楚莫過於巧婦。不過唔得閒日日煮飯嘅一班婦協名媛，都一樣明白，事關佢哋去年月中開始動土翻新嘅婦協郭得勝服務中心，啲裝修材料貴晒，分分鐘失預算。尋日婦協主席林貝聿嘉、副主席蔣麗芸、名譽顧問李麗娟以及婦女事務委員會主席盧高靜芝、中總會長蔡冠深太太蔡關穎琴等一班名女人，一齊出席支持「國際消除對婦女暴力日」活動。林太同卓妮講，中心年尾先入伙，畀職員辦工先，明年四、五月先會搞一個大型開幕儀式。
大樓由新鴻基地產郭氏家族旗下嘅郭得勝基金捐資一千萬興建，不過因為通脹，好多材料都貴晒，加上有部分舊傢俬要重置，成本都唔平。不過女人數口精，佢哋計過應該唔會超支，只係始終未埋單，未講得實。
環保概念 引入陽光海風
林太仲透露位於灣仔鵝頸橋橋底嘅婦協中心，會採用環保概念，希望做到陽光與海風嘅感覺，佢哋仲考慮引入陽光同海風，到時環保又慳電，不過呢啲設施要等政府批准，實際要幾錢埋單都未知。林太話等批咗之後可能會請新地繼續支持，等大樓「一條心」，否則佢哋就會自己籌錢包底 。林太希望翻新後嘅大樓，可以成為有創意嘅鵝頸橋特色。