政情：高錕現身全場無閃光燈
聖誕節將至，各大商場都布置聖誕樹，今年九龍塘又一城商場就豎立一棵七十呎高、橫跨幾個樓層嘅光纖聖誕樹，由高錕慈善基金籌辦，除咗紀念「光纖之父」高錕嘅卓越成就外，仲因應高錕患上腦退化症，利用聖誕樹籌款支持研究有關病症。高錕夫婦尋晚為光纖聖誕樹主持亮燈儀式，大會喺儀式前千叮萬囑在場記者及圍觀人士在拍攝時勿用閃光燈，避免影響高錕。
為光纖聖誕樹亮燈
高錕太太黃美芸解釋，高錕患有腦退化症，腦部同眼睛有密切關係，遇強光會影響情緒，希望大家切勿使用閃光燈。現場所有人都好敬重高錕，一下閃燈都未出現過，所以高錕喺成個儀式都笑容滿臉。黃美芸坦言，相信高錕未必記得自己發明過光纖，但面對光纖聖誕樹，相信會勾起以往回憶都未定。問佢哋點過聖誕節，黃美芸話喺香港簡簡單單食餐飯就算喎。
光纖聖誕樹下會安排聖誕老人同大家影相，每次六十元，善款會撥入基金作為研究腦退化症用途，基金亦製作咗二十棵每棵四十厘米高嘅小型光纖聖誕樹，全部由高錕親筆簽名，下月公開競投，底價為三千八百八十元，基金董事盧永仁希望各方善長多多支持。