【本報訊】新版鈔票無論質感及手感均較舊版鈔票優勝，香港印鈔有限公司董事及總經理劉紹全指，秘訣在於加強其厚度及透氣度，鈔票因此更「襟用」：「以前鈔票大概得三至五年壽命，之後就要收番、切碎後再運去堆填區。新版鈔票加入凹凸同雷射效果，比舊銀紙厚咗，透氣度又密啲，壽命可以延長多三成左右。」
今次新版鈔票仍採用棉紙作原材料，並無推出膠鈔。金管局輔助服務處主管陳葉小明昨表示，目前本港市面應該約有一億五千萬張十元膠鈔，但從銀行流轉情況來看，市民使用十元膠鈔的流通情況未如理想，他估計：「有市民拎住膠鈔當紀念品，令到流通量唔大，要等佢哋喺市面再行多幾轉先。」陳葉小明強調，金管局會繼續留意膠鈔的流通情況並進行檢討，又謂現階段無打算再次鑄幣。