政情：中總聯手反枱插競爭法

競爭法四面楚歌，商界展開全方位狙擊。立法會審議該法草案嘅法案委員會，商界重兵進駐，工業總會立法會代表梁君彥被推舉坐上委員會主席，據聞就係各大商會謀反競爭法嘅「最後一着」。如果政府堅持唔撤回草案，委員會亦可扮演最後關卡功能，拖慢審議進度，拖到二○一二年屆期結束，拖死競爭法。當然，呢一着兇險非常，迫不得已都唔會用，所以各大商會正密謀喺議會之外，施予重擊幹掉之。

總商會同廠商會早有風聲傳出，分別成立專門委員會，閂埋門研究競爭法嘅種種弊端，向政府提反建議，而一向最撐政府嘅中總，一直持觀望態度，按兵不動。但消息指，競爭法對商界影響太大，中總無法獨善其身，最近已經成立專責小組，研究點樣同政府打呢場硬仗，初步計劃仲會聯合其他如中出等大大小小過百個商會組織，一齊行動，真係唔聲唔聲嚇你一驚，殺當局一個措手不及。蘇錦樑雖然出身愛國愛港陣營，不過，呢個政治背景似乎已失「護身符」作用，連中總都出嚟反枱，本身係基督徒嘅蘇錦樑，真係要晚晚祈禱，求神保祐至得嘞。

「想要隻橙 得個爛蘋果」

同蘇錦樑分屬民建聯黨友嘅中出立法會代表黃定光尋日講起競爭法，亦幫理不幫親，指○六年政府開始諮詢競爭法，經歷前經濟發展及勞工局局長葉澍堃和前商務及經濟發展局局長馬時亨嘅兩個年代，名稱由反壟斷法，到公平競爭法，再到依家嘅競爭法，當年嘅競爭法條文寬鬆好多，但落到現任商務及經濟發展局局長劉吳惠蘭手上，變得辣好多：「商界要個橙，政府畀個爛蘋果我哋！」條例無法打擊壟斷現象，好似超級市場、燃油同航空公司咁，反而仲容易令中小企中招，正所謂「魔鬼在細節」，所以中出亦會加入反對陣營。

聞說中總專責競爭法嘅小組早前開第一次會議，亦有請蘇錦樑出席，事後有商界好友致電蘇錦樑，提醒佢外面「風大雨大」，推競爭法時唔好搏到咁盡，以免搞到自己周身蟻，最白嗰句係：「政府有好嘢都唔會益你咯！」唔知蘇錦樑聽唔聽得明呢？