中環耳目：象哥每日一蟹呷醋去肥
食埋呢個月尾，大閘蟹都差唔多到季尾喇。人稱立法會「蟹上王」嘅象哥黃定光，呢個月頭開始幾乎日日請朋友食蟹，有時仲食足兩餐。今年蟹膏特別肥美，人人都羨慕象哥有口福，但大閘蟹膽固醇高，象哥計晒數，話只准「每日一蟹」喎。
象哥尋日喺自己地頭「中出會所」請朋友食蟹，見佢捲起衫袖擦蟹，食到舔舔脷。食蟹多過食飯嘅象哥大讚今年啲蟹頂呱呱，佢喜歡以六両重大閘蟹宴客，味道分外鮮甜。象哥仲自創「去肥」秘方，話食蟹時記得「呷醋」，且愈多愈好，皆因飲醋有助去血脂，歎多兩啖蟹膏都冇有怕。
食完都唔使驗身
象哥以蟹會友只係開始，嚟緊廿日仲會繼續食。佢笑言食蟹食足個幾月，睇見都怕怕，宴客時只會睇住朋友大快朵頤，自己就忍忍口。咁蟹期結束後使唔使即刻驗吓膽固醇？象哥就拍心口話：「我啲膽固醇指標一向無問題，食完都唔使驗身。」莫非真係得天獨厚？