中環出更：名人促政府篤爆樓市泡沫
香港樓價高企、好多城中名人都睇唔過眼。理文造紙主席李運強、信興集團副主席蒙德揚（David）同工業總會副主席劉展灝（Stanley）都認為政府應該篤爆樓市泡沫。李運強更加主張樓價要跌一至兩成先至合理，等一般市民可以上車買樓。
尋日沙田馬場有賽事，李運強同兒子李文斌夫婦，仲有親家老爺一齊入場撐愛駒「包裝小子」，可惜隻馬三甲不入。李運強話畀卓妮聽，政府打擊樓市，應該由增加土地供應着手，令樓價回落。對於股市佢認為後市難跌，因為熱錢太多。
Stanley愛駒「彪形好漢」與「包裝小子」同場競技，但同告失利。講起政府打擊樓市措施，Stanley舉雙手支持，話消除咗泡沫之後，樓市未來至可以健康發展。
蒙德揚有新「女友」
David一見到卓妮就話最近有新女友，嚇咗卓妮一跳，細問之下，原來係講緊Panasonic新產品可換鏡頭相機Lumix GF2。查實市場發燒友已經等緊佢正式面世，David話，希望聖誕節前可以推出，到時會畀卓妮先睹為快。