政情：莫兆麟區選前突退黨
有建制派猛人喺區議會選舉前退黨，但原來泛民主派都有人退黨。最近有消息話，原本打算喺區選中再戰北區嘅民主黨莫兆麟，對上一個星期突然退黨。通常喺選舉激戰前夕退黨都唔係好嘢，可能係因為牽涉醜聞，以免家醜外揚。不過，莫兆麟話佢退黨純粹係因為最近搵咗份新工，喺間非牟利機構任職，經常要往返內地，所以孭住個黨唔係咁方便。
莫兆麟係白鴒黨嘅中央常務委員，亦係民主青年主席，喺黨內都算係身居要職。佢係前屆北區區議員，但喺○七年選舉連任失敗，所以打算喺嚟緊區選捲土重來，據聞仲計劃跨區空降到屯門三聖選區挑戰民建聯議員蘇炤成，但佢依家退黨，選唔選都未知。佢尋日喺社交網站上留言，話要多謝班街坊多年來愛護同支持，仲話人情比紙薄一定唔係定律添。