中環出更：黃之鋒食惡果 兩遭的士拒載
警方早前拘捕多名Uber司機，引發社會對現行的士服務不足嘅討論。學民思潮召集人黃之鋒喺個人fb貼文，自爆尋日連續兩次被的士司機拒載。有網民留言表示同情，亦有網民質疑兩位司機嘅拒載理由極不合理，估計佢哋根本係唔想接載黃之鋒，可能與黃發起佔領行動，影響大批的士司機生計有關。
南區往又一城 司機「唔識去」
家在港島南區嘅黃之鋒表示，尋日落街截的士想過海去九龍塘又一城，的士司機Ａ聲稱「唔識去」，佢改為要求載佢到九龍塘港鐵站，惟對方仍堅稱「唔得呀唔得呀，總之我真係唔識去喇！」黃之後再截另一輛的士，司機B自稱「無時間去九龍」，其後又話「趕住去接個女放學」、「佢病咗要我帶佢睇醫生」等。佢最後惟有落車，但未有交代到底最後點樣過海去到又一城，以及有冇遲到。
有網民留言指，兩位的士司機如果單純唔識路，只需Call上台問就可以解決，質疑「因為你是黃之鋒所以就……」。網民又話的士司機都係「藍絲」居多，拒載事件不難理解。