中環出更：聖心校慶星光熠熠 「阿梅」撐場
有女強人搖籃之稱嘅嘉諾撒聖心書院，上周五舉行一百五十周年校慶晚宴，城中名人舊生聚首一堂。恒生銀行女大班梁高美懿自爆讀書時係運動健將，前八達通行政總裁陳碧鏵就感謝體育老師發掘佢成為推鉛球高手，原來佢仲係學界冠軍添。
陳淑莊濃妝襯紅裙
晚宴喺金鐘萬豪酒店舉行，甩拖後嘅公民黨立法會議員陳淑莊擔任大會司儀，Tanya化行妝，着上露肩紅裙，畀班多年冇見嘅舊同學笑佢似阿梅梅艷芳。Tanya喺聖心老友多，由幼稚園讀到中七，難怪佢話：「我係徹頭徹尾嘅聖心人。」喺女人堆中成長，Tanya大叫感覺好正，難忘當年因為校園枱櫈有限，開飯時圍圈坐喺操場，感覺非常溫馨。
梁高美懿文武雙全
有份籌備晚宴嘅梁高美懿就重遇三、四十年冇見嘅同學，滿場飛打招呼。咪以為梁太係書獃子，佢讀書嘅時候好活躍，既參加籃球隊、田徑隊，仲係合唱團、辯論隊同話劇組成員之一。多年冇唱校歌，梁太都忍唔住同班師姐師妹上台開金口，緬懷昔日情。
沉寂咗一排嘅陳碧鏵都係聖心舊生之一。咪睇佢打扮lady，讀書時原來好tough，曾攞過學界推鉛球比賽冠軍，佢話多得體育老師發掘。陳碧鏵黯然離開八達通後，去向未明。佢話仍在休息中，閒來陪伴家人、瞓覺同睇書，但公司有需要嘅話，會幫董事局做嘢喎。
校慶宴上仲有一位稀客，佢就係前英國首相貝里雅嘅阿嫂Lady Blair。佢上台高舉保留至今嘅聖心幼稚園校服，認真長情。Lady Blair仲帶領一班學生高唱一曲《You Raise Me Up》，掀起晚宴高潮。
嘉賓席上，卓妮仲見到港大內科學系榮休教授楊紫芝。楊教授中學時考入聖心，花咗唔少時間適應。佢話小學時讀中文學校，入到聖心後以全英文教學，一度唔知老師講乜，苦讀下終於名列前茅。
卓妮