政情:丟架民主阿婆黑面離場

外號「民主阿婆」的前政務司司長陳方安生,未知是否年紀大,上周日區議會選舉只是到住所所屬選區幫「傘兵」拉票半小時,其他時間就去恤髮、歎茶過退休生活。到尋日佢出席香港大學學生會論壇,因為全場只得一個觀眾,當堂無癮黑面離場。民主阿婆這塊港英餘孽「舊電池」無心無力,又無叫座力,還耍大牌嫌少人捧場,正如專業演員就算剩下一位觀眾都要用心演落去,民主阿婆真是「茄哩啡」都不如!

等極「唔齊人」 拒對空櫈演講

港大學生會尋日早上邀請民主阿婆出席「香港未來想像」論壇,同港大社會科學院院長卜約翰(John Burns)討論「公務員制度與特區政府管治困局」。比原定時間早到十五分鐘的民主阿婆準備好講稿,仲話歡迎學生提問,但原定朝早十點開始的論壇,全場包括記者、學生會成員及講者加起來都不足十人,民主阿婆可能覺得無面,主動要求延遲十五分鐘「等齊人」先開講。

遷怒學生會 「下次安排好啲」

不過,未知師弟、師妹係咪未瞓醒,抑或新生代已經無興趣再聽民主阿婆廢噏,論壇加時後依然無人入場,無癮的民主阿婆就與身邊的卜約翰商量後,黑面話現場太少學生喇,好難與學生互動,還不滿叫學生會「下次安排好啲再搞」,然後隨即拎袋走人,留下場內唯一觀眾及一張張丟空咗無人坐的櫈,場面認真唏噓,亦搞到論壇搞手相當不好意思,還在民主阿婆離開時隻手合十表示歉意。

開講有話,作為專業演員就算剩下一位觀眾都要用心演落去,民主阿婆就算過去習慣在鎂光燈下生活,是否應該堅持「演出」呢?睇怕她真的要看看《演員的自我修養》增值一吓。不過,今屆區選有很多年輕人抬頭,反映長江後浪推前浪,民主阿婆與其不時出來指指點點,是否應該順應年輕人「訴求」及早離場,交番個場畀年輕人呢?否則好似今次乜面都無晒,自己丟架咋。

第一手消息請下載on.cc東網iPhone/iPad/Android/Windows Phone Apps