中環出更：鍾志平打免費靚呔似紳士
香港工業總會副會長鍾志平（Roy）係政商界嘅活躍分子，佢又係明天更好基金理事，見聞廣自然對衣着品味有要求。早前卓妮見佢穿戴一條經典英式格仔圖案嘅Aquascutum靚呔，成個英國紳士咁款。細問之下，原來條呔係免費㗎！
陳淑玲送贈做生招牌
Roy好開心咁話，早前佢出席一個活動，條呔係長江製衣董事陳淑玲（Shirley）送畀佢嘅。佢話好鍾意條呔嘅格仔圖案，當日特登襯咗件淺藍色恤衫。佢講起條呔時好得意洋洋，又急不及待穿戴出嚟，都幾貪靚噃！
其實Aquascutum係長江製衣嘅同系公司YGM旗下業務，去年底YGM將呢個英國品牌嘅亞洲業務收歸旗下，成為佢哋管理嘅眾多品牌其中之一。
Shirley係長江製衣創辦人陳瑞球囡囡，佢又係香港品牌發展局主席，由佢負責推動促進香港品牌發展，實至名歸。佢送咗條自家靚呔畀Roy，等佢做生招牌，真係皆大歡喜！