政情：鬍鬚曾亂落重藥殺錯良民

政府多次出招壓抑樓價都軟弱無力，換來國際貨幣組織嚴詞警告及罕有教路，令香港冇晒面。財政司司長鬍鬚曾喺國基會報告發表一日後終於出招，包括向短期轉手樓宇交易，徵收相等於樓價百分之五至十五嘅額外印花稅，並透過金管局調低樓宇按揭嘅成數，由依家嘅七成降低到六成至五成不等，不過旋即又被批落藥過重同殺錯良民，令好多本來啱啱儲夠首期嘅中產用家買唔到樓，真係做乜錯乜！