中環出更：年年驗胸防乳癌 名媛唔尷尬
乳癌，係女人聽見都驚；但名媛淑女唔再避忌，定期做例行檢查。行政會議成員查史美倫自爆年年驗身，佢同事張建東嘅太太同邱德根孫女邱詠筠（Winnie），都大方承認有定期做胸部檢查，仲話冇乜值得尷尬。
香港乳癌基金會上周六喺灣仔會展舉行五周年慈善晚宴，政商界名人齊齊現身撐場，除咗張建東夫婦及查太，仲有大新銀行主席王守業夫婦、駿豪集團常務副主席王英偉夫婦、馬會大董周永健夫婦、財經事務及庫務局局長陳家強、發展局局長林鄭月娥等，一眾名太仲同卓妮分享對抗乳癌絕招。
張建東太太話，做乳房檢查並不尷尬，佢每年都會檢查一次，平時亦注重均衡飲食，勤做運動，游水、健身都啱佢。張太仲話畀卓妮知，多年來佢都堅持跳排排舞，唔怪得身形Fit到漏。除咗Keep Fit，張太都緊張兩個囡囡，擔心佢哋工作忙捱得辛苦，每晚都會煲唔同靚湯，等家人同自己都健康啲。
邱詠筠錫身拒夜蒲
邱家千金Winnie都話最近嘅身體檢查報告「好靚仔」。唔少女士覺得驗胸好尷尬，Winnie就話健康最緊要，冇乜值得顧慮。原來佢係錫身一族，平日拒絕夜蒲去夜街：「因為工作忙，無足夠睡眠好難應付。」令佢最窩心嘅，當然係媽咪煲嘅靚湯。
查史美倫都係年年驗身族：「我一年做一次（檢查），唔覺得尷尬喎。」驗身同扮靚一樣，唔懶得，富士攝影器材主席孫大倫嘅太太近日開咗間護膚產品專門店，產品名稱同賣開嘅菲林係同一名字，品質做到好細緻，齋睇孫太嘅白滑肌膚，就知係生招牌喇！
卓妮