政情：嚴迅奇唔做畫家有原因
作為唯一一位獲邀設計三個西九文化區概念圖則之一嘅本地建築師，嚴迅奇當然有自己嘅能耐。佢細細個已經好鍾意畫畫，非常之有藝術天分，但最後都係當唔成畫家，為嘅原來係一個最現實嘅問題，就係畫家搵唔到食。
最新一期嘅中文大學新聞與傳播學院學生刊物《Varsity》，專訪咗呢位本土建築師，揭開佢鮮為人知嘅一面。嚴迅奇話自小愛好藝術，經常設計聖誕卡、不同目錄冊等等，展現天分，但身邊人士就不停警告佢話，「畫家永遠都搵唔到食」，真係幾無癮。最後嚴迅奇果然無做到畫家或者設計師，反而揀咗做建築師，莫非係向現實低頭？嚴迅奇就解釋話，自己只係唔想做純設計師，希望結合藝術與環境科學，透過建築設計，實際解決人民嘅生活問題。
對於三個西九概念圖則，嚴迅奇話好慶幸自己係有份參與嘅唯一一位本地設計師，話晒係本地薑，佢相信自己會更加了解本土居民需要同城市空間，而佢嘅設計方案最大賣點，就係簡樸跟實用，果然係徹頭徹尾嘅本地薑。