中環耳目：陳南祿落「Can.teen」買叉燒飯
太古（中國）主席陳南祿（Philip）為人好隨和，上星期香港賽馬會頒發獎學金畀二十八名大專學生，Philip以大董身份同學生打成一片，風趣又幽默。Philip食嘢都有佢平民化嘅一面，美心集團旗下Can.teen嘅叉燒飯就係佢最愛，有時仲會同同事一齊食添！
Philip係美心集團嘅姑爺，開飯都係覺得美心好。佢喺太古廣場返工，晏晝如果冇應酬，佢好多時會諗起海富中心Can.teen嘅叉燒飯。有一日佢同秘書一齊去買飯盒，撞啱有四位同事都喺度買叉燒飯，於是一行六人帶埋六盒叉燒飯返公司嘅會議室一齊食，大家有傾有講不知幾開心。叉燒飯每盒廿八蚊，食叉飯飲可樂，佢就覺得好幸福。
Can.teen係美心集團近年新開嘅快餐品牌，當中最受歡迎嘅係叉燒飯，但係佢哋唔止有中式食物，仲有好多國際美食，例如意粉、餡餅、壽司、鮮果汁及即磨咖啡一樣勁受歡迎。
