中環出更：肥胡迎新同梁栢賢好傾啲
醫管局前日公布由質素及安全總監梁栢賢出任行政總裁一職，接替今年七月突然辭職嘅蘇利民；梁栢賢一直被視為大熱中嘅大熱，由佢接棒，卓妮都唔覺得意外。不過梁栢賢下周一才正式履新，醫管局主席胡定旭尋日已急不及待約埋幾個朋友同梁栢賢去香港會食晏迎新。佢哋離開時咁蹺遇到前教統局局長李國章（阿瑟王），阿瑟王隨即上前恭賀梁栢賢榮升CEO，難得咁啱，肥胡拉埋佢哋兩個，影番張上任前夕嘅大合照。
難得見到肥胡，卓妮梗係要問佢同中國人合作，會唔會同聲同氣好傾啲？肥胡就笑笑口話：「你即係話我啲英文差啫！」事關前任CEO蘇利民係澳洲人，講英文。其實肥胡有意無意咁射歪咗，答咗等於無答，不過佢都承認同梁栢賢的確好傾啲，相信會合作無間。卓妮轉頭問過梁栢賢上場有乜大計，佢就話首要任務係減輕醫管局同事嘅壓力，盡量加強上下層溝通，希望洗脫同事對高層「大石壓死蟹」嘅觀感喎！
阿Ron戴紅呔有妙論
卓妮轉頭又見到港交所主席夏佳理（Ron）喺香港會行出嚟，肥胡一見阿Ron就話：「今日戴條紅色呔，唔怪得股市係咁升啦！」阿Ron笑笑口就糾正話，紅色喺香港代表跌市，唔係咁老利，綠色至係升市，但內地剛好相反，紅升綠跌，不過依家兩地經濟咁緊密，無所謂啦！問阿Ron點睇股市連日升勢，佢就反問話：「升呀？」咁係咪時候入市呢？佢都係嗰句：「總之入市要量力而為啦！」呢句話永遠都唔會錯。
卓妮