中環出更：扮嘢文打造中環玩具街
蘭桂坊嘉年華好快喺下周五（十二日）一連三日展開，今年以南美風情為主題，蘭桂坊始祖盛智文（扮嘢文）尋日就拖埋一班性感女郎出嚟大跳森巴舞做宣傳，氣氛熱情高漲。不過，扮嘢文最雀躍都係中環和安里喺嘉年華期間變身為玩具反斗城兒童街，大人細路共冶一爐，不過佢話可惜自己個乖孫太細未能參加，所以期待乖孫大個後兩爺孫一齊上陣。
卓妮同扮嘢文傾開，原來佢啱啱去完四川成都返港，專程上去為旗下成都蘭桂坊籌辦萬聖節派對。佢話當地人從未接觸過萬聖節，但今年初次接觸就玩得好開心，正如廿幾年前佢將萬聖節引入香港一樣，頭一年只有外國人扮鬼，但第二年開始有中國人扮埋一份，玩玩吓逐漸變成習慣。為咗引入更多新活動到內地，扮嘢文特別叫成都嘅同事來港參加今次嘉年華。
學校冇性教育靠自學
至於今年嘉年華點解獲一個安全套牌子贊助，扮嘢文話蘭桂坊係年輕男女嘅聚腳點，有需要提供適當性教育，希望藉此關懷愛滋病人。講起性教育，扮嘢文笑稱自己當年學校無得教，全部要自學，仲話係人都會接觸性愛，所以唔使尷尬，但必須關注安全性行為嘅重要性，否則搞大咗個肚就唔知點算喎。出嚟玩嘅年輕男女，就要聽吓扮嘢文嘅肺腑之言喇！