政情：Tim霍睇《東方》了解廢令
立法會大前日（周三）激辯反對擴建將軍澳堆填區嘅「廢令」議案，最後以五十五票贊成、兩票反對及一票棄權通過「廢令」，寫下歷史性一刻。到底邊位議員咁嘥料缺席投票呢？咪就係體育、演藝、文化及出版界嘅霍震霆（Timothy）嘞。
前日（周四）立法會舉行答問大會，又係行政立法對壘嘅戰場，火花四濺，議事堂內人人打醒精神，但Tim霍卻坐喺位上，氣定神閒攤開份《東方日報》慢慢細讀，相當搶鏡。睇真啲，原來Tim霍睇緊大前日立法會高票廢法重挫政府嘅新聞，睇報紙了解番「廢令」議案嘅激辯過程，掌握事態發展，佢識搵《東方日報》嚟睇，都算識揀喎。
Tim霍喺激辯「廢令」議案時缺席投票，但前晚卻現身建制派飯局，為香港申辦亞運拉票。睇嚟Tim霍對自己嘅議會工作，真係好識分「輕重」先後，而佢喺答問大會聚精會神睇報紙，係咪反映答問大會喺佢心目中只係吹水例會？