- on.cc 東方互動主頁
- 3月18日 (二)
教育局局長孫明揚尋晚出席由青協主辦嘅活動，同來自廿六間學校嘅四百幾名學生對談。依家嘅學生真係唔簡單，面對高官毫無懼色，問題尖銳。好似可立中學嘅陳同學就問到，可唔可以喺課程之中加入政治議題，例如內地在囚異見人士劉曉波獲頒諾貝爾和平獎咁。有同學就問孫公覺唔覺得母語教學失敗。有位黎同學仲搞笑，話有位男同學去咗某個女同學屋企，再將相擺上facebook，之後男嘅畀學校停課、女嘅就畀學校針對，問孫公點算好？
同學問得尖銳，孫公卻一如故我地帶大家遊花園。好似將政治問題加入課程咁，佢答話唔係一定要將難倒政府嘅議題日日以偏概全咁講，歷史上好多章節抽出嚟都好有影響力。佢仲話，「六四」可以講，但唔係要日日講，亦唔好以為政府一定迴避。
講到母語教學，孫公話母語教學有好處，但都叫大家要學好英文，所以要微調語言方案喎。至於嗰條學生被學校停課嘅問題，孫公更加牛頭唔搭馬嘴，話學一定要返，唔返就會畀個命令去返學。聽咗孫公咁多答案，在場學生唔知有幾多聽得明呢？
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
