中環出更：光哥乖孫迪士尼慶生辰
尋日十月五日係個好特別嘅日子，事關係多位政商界名人孫仔孫女嘅生日。一歲大嘅有保安局局長李少光（光哥）孫女Gianna，三歲大嘅就有自由黨「莎姐」周梁淑怡外孫女余心予及利豐集團主席馮國經嘅孫仔，五歲大嘅則有自由黨前主席田北俊外孫仔Domanic，四個都係同一日生日，真係夾都無咁啱！
光哥做藝員嘅囝囝李霖恩同太太方燕凌去年十月五日誕下Gianna，估唔到話咁快就一年。Gianna一歲生日，霖恩兩公婆尋日帶咗Gianna去暢遊迪士尼樂園慶祝，玩得好開心，期間仲同小熊維尼（Winnie the Pooh）合照，一個既溫馨又幸福嘅家庭展現眼前。
Gianna過完一日家庭樂後，晚上再同爺爺光哥及嫲嫲食飯慶祝。至於爺爺送乜嘢禮物畀孫女，霖恩就話賣個關子，遲啲等光哥親自講畀卓妮知喎。