中環出更：朱鼎健帶你「登月球」打Golf

觀瀾湖喺廣東省有十二個高爾夫球場，橫跨深圳、東莞兩個城巿，係目前全球最大嘅球會。不過，一個海口就有十個球場，並設有五百一十八間酒店房間、十一間主題餐廳、會議設施、水療中心、康體歷奇設施、購物商店等，仲有興建中嘅貴賓獨立屋、二百三十八個融合七大洲設計嘅火山岩溫泉，成個綜合旅遊規劃耗資三百億元人民幣，將於未來三年相繼落成。

咪以為造價咁貴就係粉雕玉砌兼不切實際，相反，每一個角落都係物盡其用，既不浮誇又不浪費，但要喺一萬年歷史嘅火山岩地上面興建度假村，卻絕不簡單，既要重新鋪土種草，又要保留原來面貌。好似原來生長喺火山岩石上嘅二萬幾棵荔枝樹，阿Ken就下令一棵都不能少，仲加建護生植物，保護古樹繼續生長。至於椰子、貝殼及火山石頭，就用作擺設點綴度假村，絕不浪費。

藝高膽大 點石成金

海南島同夏威夷喺同一個緯度，夏威夷海灘係旅遊重點，何解觀瀾湖要捨易取難，揀海口一片荒蕪嘅岩石漠嚟開發？藝高自然膽大，身為總指揮嘅觀瀾湖老闆朱樹豪，一見到海口呢個「月球表面」，二話不說就扑錘，睇中幅地無人住，減少發展阻力，加上近機場，交通方便，氣候又無三亞咁熱，藍天白雲仲無限量供應添，配合天時地利人和，試問要再創造神話又有何難呢？

朱樹豪嘅心意，可能其他人唔明，但同佢血脈相連嘅阿Ken就好明白，阿Ken呢兩年全力幫父親創造海口神話，點石成金。阿Ken環看海口高球度假村相繼落成，嗰種成功感，實在難以言傳，但亦不敢獨攬功勞，佢謙虛話：「我好佩服我爸爸，佢真係英雄造時勢！」

觀瀾湖海口國際高球度假村本月廿八日就會舉行一連四日嘅世界職業明星邀請賽，且看全球頂級高手如何一桿入洞！

觀瀾湖海口高球度假村酒店。 （觀瀾湖提供圖片）	金碧輝煌嘅宴會廳。（觀瀾湖提供圖片）	中餐廳Silver Moon嘅裝潢相當有品味。 （觀瀾湖提供圖片）
住客可以喺水療客房享受獨特嘅水療體驗。 （觀瀾湖提供圖片）	興建前 觀瀾湖海口高球度假村之前係一片荒蕪嘅岩石漠。	興建後 由岩石漠變身為綠草如茵嘅高球場，簡直係點石成金。

卓妮