中環出更：陳裕光特訓愛女闖出新天
外國富豪爭住捐身家，擺明唔想寵壞子女，香港富豪特訓二代則各師各法。大家樂主席陳裕光就講明要仔女闖天下，自力更生，千金陳浩寧（Candice）更大爆爸爸從小拉佢一齊行地盤，喺沙塵滾滾嘅工地上構建新餐廳。呢招身教好奏效，今天Candice已成為獨當一面嘅室內設計師，前日仲獲頒「設計企業家獎」添。
香港才女多，專門協助弱勢婦女嘅慈善機構「心話」，前晚舉行第一屆慈善晚宴，表揚八位成功年輕女企業家。除Candice外，中策集團主席馬時亨千金馬露明（Christine）、富豪趙世光女兒趙式和（Jane），以及足總董事余錦基千金余詠君（Wendy）分別獲獎。
唔打家族工 開設計師樓
廿六歲嘅Candice係爸爸嘅掌上明珠，陳裕光拉埋太太同兒子浩弘為女兒打氣。Candice喺紐約讀室內設計，返港後唔打家族工，開設計師樓闖天下。雖然家族旗下嘅「大家樂」、「利華超級三文治」都搵佢搞設計，但Candice憑實力，吸引「零食物語」及多間連鎖飲食集團找上門。咁叻女，爸爸都忍唔住讚囡囡有審美眼光，笑言自己已經好out，唔及阿囡囡咁in喎。
開辦德育學校JEMS嘅Christine，就獲頒「教育企業家獎」。JEMS以遊戲同活動，向小朋友灌輸道德教育，喺香港咁功利嘅社會嚟睇，當然係開班教中、英、數更賺錢，但Christine認為道德教育係無價寶，創新思維漸獲新一代家長認同，報讀人數爆晒燈。
才女以外，晚宴上仲有善心人，恒生已故創辦人何善衡孫新抱何倍倩（Anina）以私人名義贊助「心話」活動，認真有心。見到好友Wendy攞獎，Anina更興奮地上前恭喜對方。
卓妮