中環出更：電影迷郭位最愛《梁祝》
城市大學昨日獲邵氏基金會（香港）有限公司一次過捐出一億元，不但係城大歷來收取最大筆嘅單一捐款，配合埋港府嘅第五輪「一對一」配對補助金計劃，更加等於幫城大一次過進帳二億元，難怪城大校長郭位尋日出席支票遞交儀式時，笑到見牙唔見眼喇！
郭位又喺儀式上自爆係邵氏電影迷。喺台灣出生嘅郭校長表示，佢早喺中學時代已開始睇邵氏電影，最鍾意係一九六三年由凌波、樂蒂主演嘅《梁山伯與祝英台》，話喺戲中反串梁山伯嘅凌波，又好戲又帥氣，係佢當年嘅偶像。佢又話戲中多首黃梅調歌曲非常經典，並即席哼咗其中一首插曲《十八相送》幾句添！
沈祖堯偕同事高歌賀節
至於中文大學校長沈祖堯，原來一樣鍾意表演歌喉。尋日佢首先連同四百幾位中大師生，拉晒橫額喺中大校園步行半小時，以響應國際無車日，之後佢又再同一批師生一齊慶祝中秋節，並拉埋一眾副校長同台高歌《月亮代表我的心》，與眾同樂。