政情：張學明要休養唔訪台
兩岸關係近年大幅改善，香港政壇亦掀起一陣訪台熱潮，多名特區高官同政黨代表先後組團訪台，最近又輪到十八區區議會主席，喺嚟緊星期日啟程，出訪台北同台中共四日三夜，係首次以區會主席名義訪台。不過，據聞今次只有十七位主席可以成行，原來大埔區議會主席張學明（圖），剛剛喺本月初做完通波仔手術，要休養一排先至適宜遠行。
學明本月四日出席一個鄉村環保活動時，身體精神仍全無異樣，但據聞翌日突然嘔吐，當初仲以為食錯嘢，但經過詳細檢查後，發現心臟大動脈血管栓塞，醫生建議即時同佢「通波仔」，最後手術非常順利。學明個幾星期前已經出院返屋企休養，並取消晒所有公開活動，就連前日嘅鄉議局執委會都無出席主持會議。
心血管病係香港嘅第二號殺手，學明嘅立法會同事「大舊石」石禮謙，過去九年來就六度通波仔，不過大舊石身形肥大，又鍾意食好嘢飲靚酒，佢有呢類毛病唔算出奇。學明身材中等，又經常落鄉，運動量十足，真係點都睇唔出會有心血管病，各位政界人士真係好應該定期檢查身體，咁先可以有心有力為市民服務。