政情：徐立之敦煌撞見ufo
香港最近掀起ufo熱，話說上星期三（八日）晚雷雨交加，六個鐘頭之內，錄得超過二萬五千次雲對地閃電，期間有巿民話見到不明飛行物體，孰真孰假真係要問吓外星人先知。不過港大校長徐立之就話上個月喺敦煌都見到疑似ufo。
本周三晚饒宗頤學術館之友喺潮州商會設宴，慶祝潮州商會永遠名譽會長陳偉南獲頒港大名譽大學院士，國學大師饒宗頤同港大校長徐立之都有出席。早排饒老九十五歲生日，潮州幫同饒老fans齊齊陪饒老去敦煌，搞大型生日派對慶祝，所以饒老同校長喺晚宴再度碰頭，大家講起旅程點滴，依然回味。
話說有晚校長同成班朋友去睇星星，見到成條銀河，令佢大為驚嘆，事關校長雖然唔係第一次去敦煌旅遊，但上次去集中睇古蹟，夜晚早早瞓咗，今次睇到咁壯觀景致，令佢大開眼界；更難忘係見到三粒流星後，再見到一粒光點喺天空zigzag（之字形）咁行，初頭有人懷疑係流星嘅一種，校長返到香港，向天文學專家請教，專家話可能係ufo喎。宇宙浩瀚，真係無奇不有！